Një grua në Birmingham u godit dhe u la pa ndjenja përtokë, teksa po mbronte shoqen e saj kineze, e cila u akuzua si mbartëse e koronavirusit.
Meera Solanki nga Solihull kishte dalë për të festuar ditëlindjen e saj të 29-të me miqtë e saj, në një bar në rrugën Frederick. 29-vjeçarja ishte brenda në bar me miqtë e saj, përfshirë Mandy Huang, 28 vjeç, nga Kina, në momentin kur u ngacmuan nga një grup burrash aziatikë.
Grupi vendosi të largohej, pasi Solanki u tha se po ngacmohej vazhdimisht nga një prej burrave aziatikë.
“Unë po pija për ditëlindjen time me një grup vajzash dhe djemsh, përfshirë disa miq kinezë”, tha Solanki.
“Kishte një grup burrash aziatikë brenda vendit të ngjarjes, njëri prej tyre vazhdonte të vinte tek unë dhe të më ngacmonte. Ai dukej se kishte një problem me mua duke qenë një vajzë indiane, me një grup miqsh të racave të ndryshme”, tha ajo për The Sunday Mercury.
“Ne u përpoqëm ta injoronim atë, edhe kur ai u përpoq të pështynte në një nga miqtë e mi. Në fund të natës – kishim mbetur vetëm tre vajza, duke përfshirë edhe miken time kineze Mandy. Burri u kthye përsëri dhe ishte agresiv, kështu që ne u larguam, por ai na ndoqi. Për arsye të panjohura ai u zemërua me të vërtetë me shoqen time. Ai filloi të abuzonte duke e ofenduar atë. Ai tha ‘merre koronavirusin tënd dhe ktheje përsëri në shtëpi’”, shtoi ajo.
Solanki tregoi se u trondit dhe e zemërua aq shumë saqë i bërtiti burrit për të ndaluar, ndërsa u përpoq ta largonte tej.
“Ai më goditi në kokë, unë godita trotuarin dhe mbeta pa ndjenja”, tha Solanki.
Solanki kaloi gjashtë orë në Spitalin Heartlands, ku ajo u trajtua dhe mori 1 javë leje nga puna.
