Emisioni investigativ “BOOM” në RTV Ora solli në kujtesë këtë të martë një nga premtimet e kryebashkiakut të Tiranës, Erion Veliaj.
Bëhet fjalë për kartën e studentit e cila, sipas z. Veliaj ofron 40 shërbime me çmim të reduktuar por edhe falas.
Veliaj: Ja cilat janë 40 shërbimet që përfitojnë studentët . Transporti publik, aboneja për studentin ka vlerën 600 lekë për një muaj, ndërkohë që është 1600 lekë çmimi standart. Muzeu Historik Kombëtar, 60 lekë kur çmimi standart është 200 lekë. Kulla e Sahatit dhe muzeu përkrahë tij janë falas për studentët. Muzeu i Forcave të Armatosura është falas. Muzeu i Bankës së Shqipërisë është falas. Galeritë, për studentët galeria Fab është falas, galeria Zeta është falas, galeria Kalo është falas, Art Galeri Rira është falas. Galeria Kombëtare e Arteve është falas…
Por sa prej shërbimeve me anë të kësaj karte janë në funksion? Emisioni “BOOM” ka kryer këtë vëzhgim nga ku rezulton se shumë prej shërbimeve që pretendohet të ofrohen falas, në të vërtetë kanë funksionuar edhe më parë në këtë mënyrë.
Muzeu i Shkencave të Natyrës
Gazetarja: 500 lekë të vjetra ka qenë historikisht, gjatë gjithë kohës? Sa vite keni që punoni këtu?
Punonjësi: 3-4 vjet!
Gazetarja: Në këto katër vjet ka funksionuar kështu?
Punonjësi: Kështu, kështu ka qenë.
Nga vëzhgimi i bërë duket se shumica e këtyre shërbimeve kanë qenë pa pagesë edhe para nxjerrjes së kartës së studentit.
Madje disa prej tyre pohojnë se nuk i kërkojnë studentëve që ta nxjerrin kartën e studentit për të përfituar.
Sipas z. Veliaj, nga kjo kartë përfitojnë studentët, por sa informacion kanë ata dhe sa e përdorin?
“BOOM” ka intervistuar disa studentë.
Gazetarja: Sa kohë keni që e keni marrë?
Studenti 1: Një vit.
Gazetarja: Çfarë keni përfituar?
Studenti 1: Asgjë, edhe aboneja mundesh ta gjesh me një date, vendosin dy, tre data dhe në cilën date duhet të shkosh, nuk është se shiten kështu…
Gazetarja: Çfarë keni përfituar?
Studenti 2: Asgjë, nuk e kemi përdorur fare.
Gazetarja: Për abonenë?
Studenti 2: Nuk na duhet jo.
Gazetarja: Për shëndetësinë?
Studenti 2: Jo nuk funksionon.
Nga informacionet e marra rezulton se shumë studentë janë pajisur me kartën e studentit, por ata pohojnë se nuk e kanë përdorur.
Ata shprehen se shërbimet që ofron ajo nuk i përmbush kërkesat bazë që kanë këta studentë.
