Stuhia “Ciara”, ka goditur Evropën Qendrore dhe Perëndimore duke shkaktuar dëme të shumta materiale dhe viktima, parashikohet se ditën e nesërme do t’ i afrohet Shqipërisë.
Parashikohet se stuhia “Ciara” do të sjellë në vendin tonë forcim të erës dhe reshje me intensitet mesatar.
Metrologia Adiola Bani nga Meteoalb ka folur në lidhje më këtë çështje në Ora News. Bani ka thënë se gjatë ditës së nesërme në vendin tonë do të ketë reshje mesatare dhe lokalisht intensive në pjesën më të madhe të vendit. Reshje më të dendura do të ketë në zonat veriore dhe verilindore.
“Përsa i përket erës që shkakton dëmet më të mëdha të shoqëruar me shi do të jetë problematike vetëm në brigjet detare, sonte gjatë natës deri nesër në mesditë me shpejtësi 65-70 km/h. Duke filluar që nga mesdita e nesërme do të kemi rënie të intensitetit të erës dhe përmirësim të kushteve të motit. Puna në port nuk do pezullohet sepse për t’u pezulluar, era duhet të jetë më e fortë”, tha Bani.
Ndër të tjera Bani ka thënë: “duke qenë se kemi vranësira dhe reshje në gjithë territorin sigurisht që presim edhe rënien e temperaturave. Më i ndjeshëm do jetë gjatë mesditës së nesërme me të paktën tre gradë, kryesisht në territorin verilindor të Shqipërisë” Tha Bani.
Stuhia Ciara, shkaktoi dëme në vende si: Gjermani, Francë, Holandë, Itali,etj duke shkaktuar fluturime të anuluara dhe paralizim të transportit publik.
