Kryetari i Aleancës për Ardhmërinë e Kosovës, Ramush Haradinaj ka reaguar sërish në lidhje me vendimin e kryeministrit Albin Kurti, për heqjen e taksës ndaj mallrave serbe.
Haradinaj ka thënë se po e kërkojnë të njëjtën gjë ashtu sikurse e ka kërkuar edhe presidenti i Shteteve të Bashkuara të Amerikës, i cili përmes letrave që i ka dërguar dy shteteve ka kërkuar njohjen e Kosovës nga Serbia.
“Edhe ne po kërkojmë të njëjtën. Taksa të hiqet me njohje dhe zgjidhet problemi”, ka shkruar ai ndër të tjera në rrjetin social Facebook.
I pari i AAK-së, gjithashtu i ka thënë kryeministrit Kurti që të mos dorëzohet përpara njohjes nga Serbia, sepse sipas tij do të mbetet duarthatë.
Gjatë ditës së sotme kryeministri i vendit, Albin Kurti përmes një shkrimi të publikuar në Facebook, ka thënë se taksa do të hiqet porsa të vendoset reciprociteti si dhe se pret që Serbia të deklarohet se a ka vullnet për ndaljen e fushatës për njohjet e pavarësisë së Kosovës.
Taksa 100% ndaj produkteve serbe është vendosur më 6 nëntor të vitit të kaluar nga Qeveria Haradinaj./FastNewsAlbania
