“Vdiq Ismail Kadare”, si qëndron e vërteta e postimit të bujshëm të ministres së Kosovës

Një ditë më parë ministrja për Kulturë, Rini dhe Sport, Vlora Dumoshi mori detyrën e re ndërsa është përballur me një problem në rrjetet sociale.

Ndërkaq, Dumoshi ditën e sotme ka rënë pre e një sulmi kibernitik, pasi një adresë në rrjetin social Twitter me  emrin e saj shkruhej një lajm i pavërtetë se shkrimtari i madh shqiptar Ismail Kadare kishte ndërruar jetë.

Ky postim i rremë, në emër të ministres u bë viral në rrjetet sociale, ndërsa në një prej statuseve në gjuhen angleze, në këtë faqe thuhej se lajm mbi vdekjen e Kadaresë konfirmohej dhe nga ministrja e Kulturës, Rinisë dhe Sportit të Shqipërisë, Elva Margariti.

Pas këtyre postimeve në Twitter, ka reaguar ministrja Dumoshi në profilin e saj në Facebook, ku ka thënë se ajo nuk ka asnjë llogari në Twitter.

“Sapo u njoftova se dikush ka hapur një llogari të rrejshme në emër timin në rrjetin social Twitter dhe të njëjtën e ka keqpërdorur, duke lëshuar lajme të rrejshme -fake news. Dua të ju informoj se unë nuk kam asnjë llogari në Twitter. Menjëherë do ta paraqes rastin në Policinë e Kosovës, departamentin e krimeve kibernetike. Dëshiroj të shpreh keqardhjen time për këdo që mund të jetë trazuar nga këto lajme të rrejshme, duke keqpërdorur emrin tim”, shkruar Dumoshi.