“Do keni plot lajme” Lulzim Basha entuziast pas takimit me ambasadoren amerikane Yuri Kim

Kryetari i Partisë Demokratike Lulzim Basha ka pritur sot në një takim në selinë blu ambasadoren e re amerikane në vendin tonë, Yuri Kim.

Menjëherë pas takimit, kryedemokrati ka dalë në një prononcim të shkurtër përpara gazetarëve, ku ka deklaruar se dita e sotme ishte shumë e ngjeshur dhe me zhvillime të rëndësishme.

“Takime dhe një axhendë shumë e ngjeshur e Partisë Demokratike. Do të ju mbaj të informuar për gjithçka“, deklaroi kreu i PD-së Lulzim Basha.

Gazetarët nuk kanë ngurruar të pyesin Bashën, nëse në takimin e mëvonshëm me aleatët do të propozohet edhe koalicioni, ndërkohë Basha ka dhënë përgjigje duke u shprehur se gjithçka po bëhet për një rrugë shprese për shqiptarët.

“Ju siguroj se dita e zhvillimeve politike sot dhe atyre që do të vijnë do të jetë plot me lajme, zhvillime. Por për një gjë ju siguroj, se gjithçka që po bëhet, po bëhet për një qëllim që shkon përtej PD-së dhe opozitës, qëllimit për ti dhënë shqiptarëve një rrugë shprese dhe dalje nga kriza. Në këtë kuptim jam shumë i inkurajuar nga takimet e sotme dhe do të vazhdoj t’ju mbaj të informuar”, u shpreh  Basha.