Gazetari Adi Krasta ka ‘shpërthyer’ së fundmi, duke deklaruar hapur se kryeministri Edi Rama është i përkohshëm, ashtu si gjithë aktorët e tjerë politike.
Krasta ka komentuar ndër të tjera dhe marrëdheniet mes eksponentëve aktualë të Shqipërisë dhe Kosovës, të cilët sipas tij nuk e kanë luksin dhe as kohën të degjenerojnë në zënka banale egosh narciziste.
Gazetari ndër të tjera shprehet ashpër duke thënë se minishengeni është një krijim artificial dhe nuk i bëhet dhuratë një vendi që ka shkaktuar genocid.
REAGIMI I PLOTE I ADI KRASTES
Marrëdheniet mes eksponenteve aktuale të politikës së Shqipërisë e të Kosovës nuk e kanë as luksin dhe as kohën të degjenerojnë në zenka banale egosh narciziste.
Do na duhet të pranojmë se të gjithë aktorët janë të përkohshëm. Kështu ishte Bolton. Vetë Presidenti Trump është me mandat të përcaktuar. Kështu është i dërguari i posacëm Grenell, i cili po aplikon sjelljen ambasadoreske prej skifteri të përshkruar saktësisht nga Paul Richter. I përkohshëm, madje më shume se të tjerët është kryeministri i Shqipërisë. Ai i Kosovës gjithashtu. Të momentit janë presidentë e negociatorë.
Nuk duhet të na hutoje retorika bombastike dhe as takimet e ashtuquajtura të nivelit të lartë. Në fund vendimet duhet ti marrë populli i Kosovës.
Serbia duhet të kërkojë falje zyrtarisht për krimet e të pakten 300 vjetëve të fundit ndaj shqiptarëve. Të pranojë pa asnjë kusht mëvetësinë e Kosovës.
Pastaj le të flitet për marrëveshje të përbashkëta apo hyrje në BE. Minishengeni është krijim artificial dhe nuk i bëhet si dhuratë një vendi që ka shkaktuar genocid. Kosova nuk fiton asgjë nga një Minishengen i përkohshem dhe i pajustifikuar.
Shqiperia gjithashtu nuk fiton asgjë që nuk e ka. Prioriteti i Shqipërisë është Kosova. Nuk mund të jetë asnjë vend tjetër.
Njerëzit e politikës së marrëveshjeve të shpejta nuk duhet të helmojnë marrëdhenien brenda Familjes Shqiptare. Nuk duhet tua lejojmë.
Në Shqipëri duhet të rritet fuqia kritike. Në Kosovë nuk duhet të bien pre’ e gjuhës së gjatë të politikanëve të përkohshëm. Është konfirmuar në shekuj se ata janë të aftë të shkaktojnë me egoizmin e tyre dëme të parregullueshme.
Le të mbajmë syte tek topi ynë dhe loja jonë!
