Kush është Altin Hajri i shpallur në kërkim për pengmarrjen e Jan Prengës

Dy persona të dyshuar për pengmarrjen 10 ditë më parë në Kamëz janë vënë në pranga. Leondard Hajri u arrestua ditën e sotme pas aksionit të Policisë dhe Forcave RENEA në zonën e Shijakut, në një kompleks eventesh në pronësi të tij dhe të vëllait Altin Hajri. Ky i fundit është shpallur në kërkim.

Gjithashtu, në pranga ka rënë dhe djali i xhaxhait të tyre, pasi janë ngritur akuzat për “rrëmbim personi” dhe “vrasje me paramendim”.

Policia ngriti dyshime se Prenga mbahej peng pranë këtij kompleksi, ndërsa raportohet se në të njëjtin kompleks u sekuestruan dhe tre armë zjarri.

Kush është Altin Hajri:

Altin Hajri është një emër i njohur për policinë. Hajri ka qenë në kërkim për trafik droge dhe akuzohej se ishte kreu i një grupi trafikantësh. Ky grup, u godit pa një operacioni ndërkombëtar të Drejtorisë së Antidrogës shqiptare si dhe asaj italiane. Asokohe, në tetor të 2015 u vunë në pranga 16 persona në Itali e Shqipëri.

Brenda vitit, ky grup trafikonte mbi 1 ton heroinë në Itali. Gjatë operacionit u sekuestruan 500 kg drogë, nga të cilat 206 kg heroinë, si dhe 10 milionë euro pasuri.

Kujtojmë që në muajin tetor të 2015, policia italiane kishte shpallur në kërkim ndërkombëtar Altin Hajrin, një prej personave të dyshuar si koka e një rrjeti të trafikut të drogës nga Afganstani në Itali. Ndërsa, autoritetet italiane 8 muaj më vonë pushuan hetimet ndaj tij, duke hequr emrin nga listat e të kërkuarve.