Ditët e fundit koronavirusi në Kinë është kthyer në një kërcënim për të gjithë botën.

Në lidhje me këtë fakt dhe nëse rrezikohet dhe Shqipëria, ministrja Manastirliu deklaroi sot se vendi ynë nuk është shumë i rrezikuar, megjithatë janë marrë të gjitha masat e nevojshme për të mbrojtur qytetarët.

Edhe Instituti i Shëndetit Publik ka dhënë sot udhëzime për qytetarët shqiptarë, të cilët udhëtojnë jashtë kufinjve,  mbështetur në rekomandimet e OBSH-së për të parandaluar koronavirusin e ri.

“Nëse sëmureni gjatë udhëtimit, informoni ekuipazhin dhe kërkoni kujdes mjekësor menjëhërë. Personelit të kujdesit shëndetësor tregojini gjithë historinë e udhëtimit tuaj”, thuhet në njoftim.

Ndër të tjera ISHP me anë të fotografive, ka shpjeguar se çfarë është koronavirusi, çfarë simptomash ka dhe si mund të mbrohemi prej tij.