Ditën e sotme ministri Arben Ahmetaj ka prezantuar platformën online të rindërtimit, nga ku të gjithë familjet e prekura nga tërmeti i 26 nëntorit, duket të deklarojnë dëmet.
Në fjalën e tij Ahmetaj ka sqaruar se aplikimi do të bëhet pranë njësive vendore dhe është me detyrim në mënyrë që familjet mund të përfitojnë nga shërbimet.
“Platforma bazohet në vetëdeklarimin e qytetarëve. Qytetarët do të paraqiten pranë zyrave në bashki dhe do të deklarojnë dëmet. Aplikimi pranë njësive vendore është i detyrueshëm për të përfituar nga ndërtimi, qytetarët duhet të aplikojnë.
Çdo bashki duhet të ketë një zyrë, dhe jo thjesht do të vijnë qytetarët te ju, por skuadrat tuaja duhet të marrin qytetarët dhe t’i ndihmojnë për aplikimin online. Nuk mund të kalojmë në hapat tjera, pa pasur një dosje të plotë të aplikimit. Nesër në 11:0 të gjitha bashkitë që janë në zonat e dëmtuara do duhet të dërgojnë 3 presona, që do të trajnohen nesër në Bashkinë e Tiranës për të trajnuar të tjerët në njësitë administrative.
Mos i thërrisni qytetarët t’iu vijnë disa herë në zyrat tuaja, duhet t’i bëni ju dokumentet, me certifikatë, etj. Unë do të ndjek nga afër procesin. Procesi i aplikimit do të zgjasë 30 ditë dhe brenda kësaj periudhe duhet të ketë mbaruar ky proces me të gjitha dosjet.
Që nga sistemi i aplikimit online, deri te momenti i pikëzimit, duhet kaluar në këshillat bashkiake. Sistemi i pikëzimit ka të bëjë me faktin që ligji na detyron të kemi një listë prioritare, që nuk mund të ndryshohet sipas qejfit. Ndërkohë, nuk do t’i lini qytetarët të bredhin për dokumente, do t’i bëni vetë”, u shpreh ministri i Rindërtimit Arben Ahmetaj.
Kujtojmë se të gjithë qytetarët që kanë pësuar dëme nga tërmeti, duhet të aplikojnë në platformën online të rindërtimit dhe të deklarojnë të dhënat për pasojat që ka shkaktuar tërmeti në banesat e tyre.
Gjithashtu ata duhet të paraqiten edhe pranë njësive të caktuara vendore.
