Një ngjarje e rëndë ka ndodhur në një sallë operacioni, ku doktorët e Klinikës së Kardiokirurgjisë në Qendrën Klinike Universitare të Kosovës (QKUK), janë përleshur me njëri-tjetrin në sallën e operacionit.
Ndërkohë është njoftuar dhe policia për këtë rast, dhe nuk dihet ende arsyeja pse ka ndodhur.
E gjithë situata është konfirmuar dhe nga Flora Ahmeti, zëdhënësja e policisë së Kosovës për rajonin e Prishtinës, e cila ka deklaruar se rasti është në fazën fillestare të hetimeve.
“Sot rreth orës 12:00 kemi pranuar informatën për një mosmarrëveshje në QKUK mes dy personave. Rasti është në fazën fillestare të intervistimeve dhe me të po merren njësitet policore kompetente të stacionit jugu në Prishtinë”, ka thënë Ahmeti.
Adem Grbolar i cili është shef i repartit në Kardiokirurgji, është akuzuar më herët nga kardiologu Arbër Kutllovci për manipulim me lista të pacientëve.
Kutllovci para disa muajve kishte postuar në profilin e tij në Facebook, ku kishte bërë të ditur vendimin e tij për largim nga klinika. Ai kishte thënë se përçarjet dhe manipulimet e shefit Dr. Adem Grbolar, janë arsyeja kryesore e dorëheqjes.
“Ambienti përçares dhe morbid që është krijuar brenda Klinikes së Kardiokirurgjisë nga ana e shefit të saj (Adem Grbolar), ka qenë shqetesimi im kryesor. Mungesa e vendim-marrjes për rastet kardiokirurgjike dhe centralizimi i kësaj vendim-marrje vetëm tek shefi, -mungesa e listave operatore dhe manipulimi me to (superselektim i rasteve nga ana e shefit, njoftim për operacion disa orë para operimit,etj”, shkruante Kutllovci.
