Dyshohet si shënjestër e atentatit në Vlorë, zbulohet e kaluara e Nikollaq Çepajt

Nikollaq Çepaj (Taullaraj), dyshohet të ketë qenë shënjestra e atentatit mbrëmjen e sotme në Vlorë. Ai sapo kishte dalë nga burgu, tre ditë më parë, pasi më 8 qershor 2018, u arrestua për plagosje me armë zjarri të Eraldo Lazajt. Plagosja ndodhi brenda një lokali në lagjen “Pavarësia”.

Pas daljes nga burgu, iu bë atentat ndërsa ndodhet i plagosur në spitalin e Vlorës. Dyshohet se pista e parë ku po hetohet është hakmarrja.

Policia e Vlorës njofton se të plagosur nga ngjarja në Vlorë janë Roland Çepaj 27 vjeç dhe Nikollaq Çepaj 36 vjeç. Ngjarja ka ndodhur rreth orës 18:22 minuta në lagjen “Bashkimi” në një lokal, ndërsa sipas policisë shkak ka qenë një konflikt i çastit.

Autorët, sipas policisë dyshohet se mund të jenë larguar me një automjet ku në ndjekje të tyre janë vënë disa grupe. Njëkohësisht janë ngritur disa pika kontrolli në rrugët dalëse të qytetit dhe po kontrollohet e gjithë zona me qëllim kapjen dhe  arrestimin e autorëve. Grupi hetimor ndodhet në vendngjarje dhe po punon për zbardhjen dhe sqarimin e rrethanave të ngjarjes.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern