Edhe pse dje u ulën në një tryezë në lidhje me marrëveshjen për Reformën Zgjedhore, deputetja e opozitës së re Rudina Hajdari është përplasur keq me nënkryetarin e Lëvizjes Socialiste për Integrim, Petrit Vasili.
Teksa në studion e programit “Opinion” po flitej për temën e tryezës politike për Reformën, Rudina Hajdari sulmoi palët politike duke u shprehur se të gjitha marrëveshjet e bëra mes tyre kanë qenë një mashtrim për shqiptarët.
Por ajo vetë deklaroi se ishte në tryezë për të siguruar transparencë për shqiptarët.
Ndërkohë Petrit Vasili i ka kërkuar që të ulë zërin dhe të qetësohet, duke iu drejtuar disa herë me fjalën “pusho”.
PJESE NGA DEBATI
Petrit Vasili: Zonja Hajdari ka lindur nga ky sistem si mund ta monitorojë atë…
Rudina Hajdari: Pikërisht se vetëm brenda sistemit mund të ndryshosh diçka…
Petrit Vasili: Mos na bëj zhurmuesin… lere moj se s’të shkon kjo zhurmë këtu, pusho… pusho… qetësohu. Ore do pushosh apo s’do pushosh? Zonja është produkt i këtij sistemi dhe nuk mund të jetë garante…
Rudina Hajdari: Po lere se s’të pi ujë ky argument.
Petrit Vasili: Ky mision është një mision i pamundur, sepse zonja Hajdari mori një pozicion që moralisht është i papranueshëm për ne, që qënkërka vëzhguesja, ka monopolin e ndershmërisë absolute dhe vëzhgon ne tre të tjerët…
Rudina Hajdari: Kur flisni ju për moral, këtu unë e lë debatin fare.
Petrit Vasili: Një zonjë që është pjellë e këtij sistemi, nuk e ka këtë mision…
Rudina Hajdari: Unë kam qenë pjesë e PD që kur kam lindur.
Petrit Vasili: Moj po lere se kemi lindur para teje ne, po lere tashi…
Rudina Hajdari: Nuk jam nga ato ardhjet që mendon ti…
