Selman Hodaj ultimatum punonjësve të pa strehë,në punë edhe në ditët e pushimeve ose do pushoheni

Në një shkresë të përcjellë për punonjësit e varësisë DPAP, DRAP dhe ZVA në zonat ku është shpallur gjendja e jashtëzakonshme, drejtori i arsimit parauniversitar, Selman Hodaj u ka komunikuar se duhet të jenë në punë edhe ditët e pushimit ose do të konsiderohet si braktisje e detyrës.

Sipas vetë punonjësve, janë jo të paktë ata që kanë mbetur pa strehë pas tërmetit të fuqishëm të 26 nëntorit dhe janë larguar për t’u strehuar tek të afërmit së bashku me familjet e tyre.

“Ne mbeshtetje të VKM numër 750 datë 27.11.2019 për shpalljen e gjendjes se jashtezakonshme te zonave te prekura nga termeti punonjesit e varesis DPAP DRAP dhe ZVA, qe jane ne kete grup, duhet te jene ne gadishmeri prane qendrave te punes edhe gjate diteve te pushimit. Mos paraqitja ne pune ju ngarkon me pergjegjesi dhe do te konsiderohet si braktisje e detyres. Merrni masa te beni me dije kete njoftim per cdo punonjes ne varesine tuaj! Drejtoretvte raportojne per punonjesit qe nuk paraqiten ne detyre. Urdheri do tju vij dhe me shkrese zyrtare nga adresa e emailit te DPAP. Drejtori Selman HODAJ”, shkruhet në shkresën e përcjellë nga drejtori Hodaj për punonjësit e zonave ku është shpallur gjendja e jashtëzakonshme.

Tërmeti i 26 nëntorit i magnitudës 6.3 i shkallës Rihter ka lënë pas deri më tani 42 viktima dhe mbi 700 të plagosur në zonën e Durrësit, Thumanës dhe Kurbinit dhe qindra shtëpi të shkatërruara në 3 zona.

Ndërkohë lëkundjet e herëpashershme kanë nisur të japin probleme dhe në banesat e qarkut të Tiranës.