Historia e ministres Etilda Gjonaj, e cila kishte paguar një natë qëndrimi në hotel në Romë për plot 700 euro vijon të jetë në qendër të medieve shqiptare.
Por gazetari i njohur, Lutfi Dervishi ka publikuar në profilin e tij në facebook historinë e ish-ministrit të PD, Ilir Rusmali.
Ky i fundit kur kishte qenë në postin e ministrit të Drejtësisë kishte vendosur standardin se për drekat dhe darkat e punës, kur ato kalonin limitin e shpenzimit, ai paguante nga llogaria personale.
Sipas Dervishit ky ishte një standard i Rusmalit, por që nuk vazhdoi, pasi ai dha dorëheqjen sipasojë e një skandali që përfshinte edhe vëllain e tij.
Postimi i plotë:
Para se të ndodhte kjo histori ministri ishte në një drek pune. Por shpenzimet e drekës kishin kaluar kuotën e parashikuar.
Pehlivanët që janë gjithmonë të pranishëm sugjerojnë te kabineti ministrit që “e rregullojmë ne këtë punë”.
Si do të rregullohet?Do të shtojmë numrin e personave në drekë dhe mbetemi brenda kuotës….!
Kjo nuk u pranua nga kabineti ministrit dhe Ministri pagoi shtesën nga rroga e vet!
Kjo histori ka ndodhur vërtet dhe ka ndodhur në Shqipëri, më saktë në Tiranë, më saktë në Ministrinë e Drejtësisë.
Kur u bë publik “skandali” i vëllait të ministrit, publiku nuk e di se çfarë qëndrimi ka mbajtur ministri ndaj vëllait, por di çfarë qëndrimi mbajti ministri ndaj vetes! Dha dorëheqjen menjëherë.
Atëherë “humbëm” ministrin e Drejtësisë Rusmali dhe fituam standartin Rusmali.
Me çfarë ka ndodhur që nga ajo ditë dhe me çfarë po ndodh çdo ditë, është mirë që ky standart të dërgohet në muze!
Vetë PD-ja e atëhershme dhe kjo e tanishmja nuk e përmend standartin Rusmali. Dhe u kujdes dhe kujdeset që Rusmali të jetë sa më larg PD-së.
Të përmendësh sot në publik standartin Rusmali rrezikon që numri 112 i emergjencës/urgjencës të bllokohet nga njoftimet se një i çmendur po tregon një histori të pabesueshme.
Kështu që është mirë që ky standart të dërgohet në muze dhe ciceroni të cicërojë dhe t’u thotë vizitorëve vendas dhe të huaj se kjo ngjarje ka ndodhur vërtet në Shqipëri një dekadë më parë në vitin jo aq të largët 2008!
