Qeveria gjermane synon të përgjysmojë kuotën vjetore të punëtorëve nga Ballkani Perëndimor, nga 50 mijë në 25 mijë persona. Propozimi, nëse merr miratimin e Bundesrat-it më 18 dhjetor, pritet të vështirësojë edhe më shumë aksesin e qytetarëve të rajonit në tregun gjerman të punës.
Nisma, e parashikuar në marrëveshjen e koalicionit mes CDU/CSU dhe SPD-së, po përballet me kundërshtime nga përfaqësuesit e ekonomisë gjermane. Shqetësimi kryesor lidhet me thellimin e mungesës së fuqisë punëtore, veçanërisht në sektorë si ndërtimi, ku punonjësit nga Ballkani Perëndimor kanë një rol të rëndësishëm.
Shoqatat e punëdhënësve paralajmërojnë se reduktimi i kuotës mund të krijojë mungesë prej afro 9 mijë punonjësish në sektorin e ndërtimit gjatë vitit të ardhshëm. Vetëm në vitin 2023, rreth 17 mijë të punësuar në këtë sektor dolën në pension, duke shtuar nevojën për punonjës të rinj.
Sipas përfaqësuesve të industrisë, kufizimi i punëtorëve nga rajoni rrezikon të sjellë vonesa në realizimin e projekteve, si dhe rritje të kostove për ndërtimin e banesave dhe infrastrukturës.
Të dhënat e Shoqatës Qendrore të Ndërtimit tregojnë se një në shtatë të punësuar në këtë sektor ka pasaportë të huaj. Ndërkohë, 35% e vizave të lëshuara në bazë të Rregullores për Ballkanin Perëndimor janë përdorur për punësim në kompanitë e ndërtimit.
Përfituesit e kësaj skeme duhet të kenë një kontratë konkrete pune, ndërsa 98% e punonjësve të angazhuar përmes saj janë të punësuar në vende pune ku sigurimi shoqëror është i detyrueshëm.
Përballë këtij propozimi, përfaqësuesit e sektorit kërkojnë heqjen e kufizimit të ri, si dhe përshpejtimin e procedurave të vizave përmes një sistemi të plotësisht të digjitalizuar.







