LIGJET E BIZNESIT
Kryeministri Edi Rama gjatë fjalës së tij në Asamblenë e Partisë Socialiste, ka folur për mundësinë e uljes së çmimit të naftës në pompë, duke zbuluar se diskutimet për këtë ndërhyrje kanë nisur prej rreth dy vitesh, por deri më tani nuk është gjetur një zgjidhje që të përballojë efektin në financat publike.
Gjatë fjalës së tij në Asamblenë e Partisë Socialiste, Rama deklaroi se heqja e barrës fiskale nga çmimi i naftës do të kërkonte gjetjen e burimeve alternative të të ardhurave. Sipas tij, për të realizuar një ndërhyrje të tillë nevojiten rreth 450 milionë euro, të cilat duhet të zëvendësohen në buxhet për të mos cenuar financimin e shpenzimeve dhe investimeve publike.
“Janë 450 milionë të tjera që duhen, që nëse ti i heq te pompa, duhet t’i nxjerrësh ndryshe. Pse del llogaria sot? Sepse ekonomia është sot në nivelin e vet më të mirë, është rritur baza e të ardhurave, nuk është rritur borxhi”, u shpreh Rama.
Kryeministri e lidhi këtë diskutim me rritjen e kostos së jetesës dhe presionin që çmimet kanë krijuar mbi familjet shqiptare. Ai nuk bëri të ditur një afat konkret apo një skemë të miratuar për uljen e çmimit të karburanteve, por theksoi se kjo është një prej masave që qeveria po shqyrton.
