Humbën jetën në Letoni, memorial për dy ushtarakët shqiptarë në Camp Adazi

Një memorial për të nderuar dy ushtarakët shqiptarë që humbën jetën është vendosur në kampin Adazi në Letoni.

Ministrja e Mbrojtjes, Olta Xhaçka, ka bërë të ditur lajmin përmes një postimi në Facebook, teksa shkruan se Dëshmorët e Atdheut major Klodian Tanushi dhe nëntetar Zarife Hasanaj do të jenë përgjithmonë pjesë e grup-batalionit të NATO-s në Letoni.

Memoriali kushtuar dy të rënëve në Kamp Adazi, është zbuluar sot nga kolegët e tyre, të cilët ndodhen aktualisht me mision në Letoni.

“Dëshmorët e atdheut major Klodian Tanushi dhe nëntetar Zarife Hasanaj do të jenë përgjithmonë pjesë e grup-batalionit të NATO-s në Letoni. Kolegët e tyre, aktualisht në mision, zbuluan memorialin kushtuar dy rënëve në Camp Adazi, ku ata shërbyen dhe dhanë jetën. Lavdi përjetë dëshmorëve!” shkruan Xhaçka nëFacebook.