LIGJET E BIZNESIT
Pas shtatë vitesh në krye të Ministrisë së Infrastrukturës dhe Energjisë, Belinda Balluku ja ka dorëzuar stafetën pasardhësit të saj Enea Karakaçi.
“Enea nuk është as shoku im, as e kam sjellë unë. Por e kam gjetur këtu”. “S’kam pasur kurrë lidhje me korrupsionin dhe nuk e kam penguar e as do e pengoj drejtësinë”, theksoi Belinda Balluku në fjalën e largimit nga kabineti qeveritar katër muaj pas ngritjes së akuzave nga Prokuroria e Posaçme Anti-korrupsion.
“Nëse do t’u ktheheni deklaratave të mia për drejtësinë, nuk do gjeni kurrë asnjë deklaratë që të kundërshtojë tjetrën. Por unë besoj se drejtësia duhet të jetë e lirë dhe e pavarur. Unë besoj se drejtësia e re, si produkt i reformës në drejtësi, si produkt i vizionit të Ramës dhe PS, si produkt i një Shqipërie Europiane duhet të vazhdojë të jetë frymëzimi i këtij vendi”, u shpreh Balluku.
“Unë jam rritur me gjyqe publike”, u ankua Belinda Balluku teksa u përpoq të përgënjeshtronte ato që i cilësoi si “gjysmë të vërteta dhe gënjeshtra” në adresë të saj.
“S’kam as 300 as 30 dhe as 3 apartamente, as një e as dy jahte, as limuzina, as helikopterë dhe avionë, por të gjitha këto janë pjesë e një gjyqi publik që fatkeqësisht bëhet me lehtësinë më të madhe në këtë vend. Por për të thënë të drejtën unë jam rritur me gjyqe publike”, theksoi Balluku.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Pavarësisht se firmosi shkarkimin e saj, Belinda Balluku nuk i kurseu falënderimet dhe mirënjohjen për kryeministrin Edi Rama, duke e cilësuar atë si “modelin e saj personal të frymëzimit”.
“Jam munduar të ndjek shembullin e tij me ju dhe me të gjithë ata që kanë punuar në këto. Dhe me thënë të drejtën është shkolla më e mirë nga e cila kanë dalë drejtues, njerëz që e duan Shqipërinë dhe sakrifikojnë pa asnjë lloj dyshimi, për të mirën e madhe”, vijoi ish-zv.kryeministrja.
“Unë e di se çfarë duhet bërë” tha në fjalën e tij të shkurtër ministri i ri i Infrastrukturës dhe Energjisë Enea Karakaçi i cili ka qenë pjesë e këtij institucione prej një dekade e gjysmë në pozicione të ndryshme drejtuese.
“Jam shumë i qartë për sa i përket vizionit, qasjes, objektivat dhe për çfarë kërkohet nga kryeministri por edhe nga qytetarët, prej Ministrisë së Infrastrukturës dhe Energjisë. Jam i bindur që do t’ia dalim të çojmë përpara sfidat”, deklaroi Enea Karakaçi.
Belinda Balluku u u lirua nga detyra si zv.kryeministre dhe Ministre e Infrastrukturës dhe Energjisë, ndërkohë që ka një hetim nga SPAK, që i ka kërkuar Kuvendit heqjen e imunitetit të saj si deputete.
