Dëmet në bujqësi nga përmbytjet, ministri Salla garanton fermerët për mbështetje

Një ndër sektorët e prekur më shumë nga përmbytjet e ditëve të fundit është bujqësia. Për këtë arsye, ministri i Bujqësisë dhe Zhvillimit Rural, Andis Salla, ndodhet në terren në Levan, Fier, ku po ndjek nga afër situatën e krijuar nga reshjet intensive të ditëve të fundit dhe masat e marra për mbrojtjen e blegtorisë.

Gjatë vizitës, Ministri Salla ishte pranë blegtorit Bledi Dorda, i cili mbarështon rreth 800 krerë të imta. Si pasojë e situatës së krijuar nga reshjet, tufa e bagëtive është evakuuar në kohë, duke shmangur dëmtimet në gjënë e gjallë.

“Fatmirësisht nuk ka dëmtime në gjënë e gjallë, ndërsa për bazën ushqimore do të ofrojmë mbështetjen e nevojshme, për të garantuar vijimësinë e aktivitetit blegtoral,” u shpreh Ministri Salla gjatë inspektimit në terren.

Ministri theksoi se strukturat e Ministrisë së Bujqësisë dhe Zhvillimit Rural janë në terren për të ndjekur nga afër situatën, për të evidentuar dëmet dhe për të garantuar mbështetjen e nevojshme për fermerët dhe blegtorët e prekur nga reshjet intensive.