“Për miqtë e mi të Facebook-ut”

 Nga Auron Tare, studiues

Disa miq më kërkuan një opinion për ngjarjet në Venezuelë. Nuk e njoh këtë vend latin në thellësi, por kam ndjekur disa podkaste të specializuara ku ekspertë, pjesë e ish-administratës amerikane, shpjegonin arsyet pse Venezuela ishte vënë në qendër të vëmendjes së administratës Trump.

Bazuar në këto informacione dhe në sensin tim logjik, shkrova diçka në faqen time personale dhe shkova të fle.

Por në mëngjes, kur hapa kompjuterin, u habita nga vrulli i paparë i mesazheve që vinin nga “specialistë” shqiptarë për çështjet e Venezuelës. Nuk e dija që Shqipëria kishte kaq shumë ekspertë të marrëdhënieve ndërkombëtare, të demokracisë, naftës, të sigurisë, të forcave speciale, të politikës, administratës, gazetarisë e kështu me radhë.

Për një çast imagjinova sikur i gjithë ky vrull dhe kjo energji të ishin përdorur për të folur për hallet e vendit të tyre: për naftën shqiptare që vidhet prej vitesh, për spitalet mizerabël, për shkollat me mësues analfabetë, për policinë e veshur me “lëmosha” nga depot e botës, e për shumë probleme të tjera reale dhe të përditshme.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Ndërkohë, këta specialistë që rrekeshin të zgjidhnin hallet e Venezuelës për të cilën jam i bindur se as nuk e dinë saktësisht ku ndodhet në hartë vazhdonin të japin leksione, analiza dhe verdikte, sikur fati i botës të varej nga një status në rrjete sociale.

Qetësohuni, miq. Ruajeni energjinë për hallet e Shqipërisë. Debatoni për ujin e pijshëm, për plehrat, për zbrazjen e fshatit, për bujqësinë dhe ushqimet që hani, për varrezat e mbuluara nga plehrat që digjen çdo ditë, për peizazhet natyrore që po zhduken dita-ditës, e kështu me radhë.

Lëreni Venezuelën në hallin e vet. As mua dhe as ju specialisteve nuk na dëgjon kush në këtë botë të madhe ku jetojmë.