LIGJET E BIZNESIT
Administrata doganore do të jetë në punë pa ndërprerje gjatë periudhës së festave. Drejtoria e Përgjithshme e Doganave ka njoftuar se qëllimi është shmangia e fluksit të shtuar nga ana e bizneseve import-eksport, për shkak të rritjes së konsumit.
Për të shmangur radhët e gjata në kufi, Dogana Shqiptare ka njoftuar se të gjitha strukturat doganore në vend do të jenë në funksion të plotë 24 orë, gjatë periudhës së festave të fundvitit, me qëllim garantimin e një shërbimi të pandërprerë për qytetarët dhe bizneset.
Sipas njoftimit zyrtar, kjo masë vjen në kuadër të zbatimit të një plani të posaçëm organizativ, i cili parashikon rritjen e kapaciteteve operacionale në pikat doganore, për t’u përballur me fluksin e shtuar të lëvizjes së mallrave dhe udhëtarëve që karakterizon fundvitin.
Autoritetet doganore kanë ndërmarrë masa shtesë, përfshirë angazhimin e stafit shtesë, koordinimin më të ngushtë mes strukturave dhe forcimin e kontrolleve, duke synuar lehtësimin e procedurave doganore, shmangien e vonesave dhe përmirësimin e cilësisë së shërbimit.
Njëkohësisht, Dogana Shqiptare thekson se këto masa do të kontribuojnë edhe në rritjen e nivelit të sigurisë në pikat doganore, si dhe në mbarëvajtjen e qarkullimit të mallrave, veçanërisht për bizneset që operojnë në sektorin e tregtisë dhe import-eksportit.
Ky angazhim pritet të ketë një ndikim pozitiv në aktivitetin ekonomik gjatë festave, duke mbështetur zinxhirin e furnizimit dhe duke garantuar që nevojat e tregut të plotësohen pa pengesa, në një periudhë me rëndësi të veçantë për konsumatorët dhe sipërmarrjet.
