LIGJET E BIZNESIT
Rriten të ardhurat në buxhetin e shtetit. Të dhënat e Ministrisë së Financave tregojnë se gjatë 10 muajve të këtij viti, u arkëtuan rreth 628 miliardë lekë të ardhura nga taksat dhe tatimet, me rritje 37.7 miliardë lekë apo 6.4 për qind kundrejt të njëjtës periudhë të një viti më parë.
Nga të dhënat rezulton se peshën më të madhe në rritjen e të ardhurave këtë vit e ka mbajtur Tatimi mbi Vlerën e Shtuar në import me plotë 199.7 miliardë lekë. Rritja e pagës për punonjësit e administratës publike por edhe aksioni i tatimeve kundër nëndeklarimit të pagave bënë që arka e shtetit të përfitonte gati 70 miliardë lekë. Pozitivisht ka ndikuar edhe taimi mbi fitimin e bizneseve.
Ndërsa shpenzimet në fund të tetorit arritën në 578.8 miliardë lekë, në rritje me 59.6 miliardë lekë në raport me janar-tetorin 2024. Megjithëse në rritje, ato u realizuan vetëm në masën e 96.2 për qind të planit. Ndikim në ecurinë e dobët të shpenzimeve kryesisht atyre kapitale që lidhen me investimet patën zgjedhjet e 11 majit, që kufizojnë shpenzimet, pasi konsiderohen në shkelje me kodin zgjedhor.
Të ardhurat ndjeshëm më të larta se shpenzimet bënë që ekonomia e vendit të mbyllej pozitivisht me mbi 49.1 miliardë lekë të kursyera.
