LIGJET E BIZNESIT
Vendimi i Gjykatës Kushtetuese për rikthimin në detyrë të Erion Veliaj si kryetar i Bashkisë së Tiranës dhe rrëzimit të dekretit të presidentit, që bën që të mos ketë zgjedhje në Tiranë ishte paralajmëruar dy ditë më parë nga juristët në emisionin Terminal të gazetares Aurora Sulce në A2 CNN.
Edlira Çepani, drejtore e Rrjetit të Grave “Barazi në Vendimmarrje”, me profesion juriste argumentoi se procedura është e rëndësishme dhe Gjyakata Kushtetuese do të bazohet për vendimin e saj lidhur me “fatin” e Erion Veliaj mbi procedurën.
“Kur fillojmë të flasim për procedurë, është e rëndësishme që procedura të ndiqet, edhe në rastin e zotit Veliaj, edhe në rastin e një qytetari të thjeshtë. Gjykata Kushtetuese me vendimin e saj krijon një precedent. Si do të vijojë pjesa e trajtimit, qoftë të parashikimeve kushtetuese të marrëdhënieve të zgjedhëvse me të zgjedhurit sic edhe Veliaj e tha, por do të krijojë precedent sesi Gjykata Kushtetuese do të përballet me politikën dhe ne e kemi parë që e ka bërë këtë gjë. Unë e shoh, nga ana ime si jursite, një vebdim interesant përsa i përket interpretimit ligjor. Kjo cështje në tërësi tregon që ka vakuume ligjore, të cilat duhen mbushur edhe në të ardhmen”, u shpreh Çepani.
Në të njëjtën linjë ka qenë edhe avokati Alban Duraj, i cili deklaroi se vendimi për Veliaj nuk do të bëhet mbi shkaqe morale, por ligjore.
“Është ndryshe gjykimi moral që mund t’i bëjmë ne si qytetarë, që ka dhënë leje ndërtimi, që mund të kemi rezervat tona për mënyrën sesi ka drejtuar zoti Veliaj, por aty jemi për një shkak specifik”, ka deklaruar Duraj.
Parashikimet që bënë jursitët në emisionin Terminal rezultuan të sakta dhe me vendimin e sotëm Gjykata Kushtetuese ka rikthyer në detyre si kryetar bashkie Erion Veliaj dhe ka anuluar zgjedhjet e pjesshme vendore për kryeqytetin.
