LIGJET E BIZNESIT
Qeveria do të kompensojë të gjitha dëmet që kanë pësuar qytetarët nga zjarret. Kryeministri Edi Rama, përmes një video-postimi në rrjetet sociale, njoftoi se të gjitha familjet që kanë pësuar dëmtime nga zjarret që kanë përfshirë vendin gjatë ditëve të nxehta të verës do të kompensohen për çdo dëm.
“Dua t’i siguroj të gjithë, qoftë familjet që kanë humbur plotësisht shtëpitë, apo ata që kanë pësuar dëmtime, se po veprojmë sipas protokollit të situatës dhe me autoritetet përkatëse për inventarizimin e plotë të dëmeve. Padiskutim, si ka ndodhur në të shkuarën, do të ndodhë edhe tani. Askush nuk do të mbetet vetëm; qeveria dhe shteti do të jenë pranë çdo familjeje për t’u rikthyer në një shtëpi më të mirë dhe për të marrë dëmshpërblimet përkatëse, edhe për krerët e humbur”, ka thënë kryeministri.
Rama ka deklaruar se përveç dëmeve të banesave, deri tani janë regjistruar 36 mijë krerë të humbur që do të kompensohen. Ndërkohë, 207 shtëpi janë dëmtuar nga zjarret masive që prekën vendin në orët e fundit, nga të cilat 40 janë djegur totalisht.
