LIGJET E BIZNESIT
Një ditë më parë, Banka e Shqipërisë vendosi të ulë koston e lekut, në përpjekje për të nxitur ekonominë. Norma bazë e monedhës vendase ka zbritur aktualisht në 2.5%. Kjo është ulja e tretë që bën Banka Qendrore në harkun kohor të dy viteve. Një ndërhyrje e argumentuar nga institucioni mbikëqyrës bankar me rrezikun që ekziston për rritjen e kostove të prodhimit dhe inflacionit në të ardhmen.
Por cili pritet të jetë ndikimi në ekonomi pasi banka bëri këtë ndërhyrje?
Ajo që do të ndodhë është ulja e interesave të kredive të reja në lek, cka pritet të nxisë huadhënien; ulja e interesave të depozitave në monedhën vendase; ulja e interesave të letrave me vlerë të qeverisë, ku përfshihen bonot e thesarit dhe obligacionet; si dhe një perceptim pozitiv që kanë investitorët e huaj ndaj lehtësimit monetar.
Vendime të tilla për uljen e normave të interesit kanë marrë më herët edhe Banka Qendrore Europiane për euron dhe Rezervat Federale në Shtetet e Bashkuara të Amerikës për dollarin. Cka do të thotë se Banka e Shqipërisë ka ndjekur bankat e tjera qëndrore në zbatimin e një politike lehtësuese monetare.
Norma bazë e interesit për dollarin luhatet aktualisht nga 4.25% në 4.5%; norma bazë e interesit për euron varion nga 2 në 2.4% dhe norma bazë e lekut është sot 2.5%; cka do të thotë një nivel që është në mes të kostove të dy valutave të forta.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
