LIGJET E BIZNESIT
Zona e Ish- Bllokut do të ndryshojë tërësisht. Bashkia e Tiranës ka shpallur një tender me vlerë mbi 246 milionë lekë pa TVSH, për rehabilitimin urban të kësaj zone.
Materialet e propozuara për këto korsi janë: asfalt me pigment të kuq dhe me gurë të bardhë të shpërndarë dhe të rashinuar, përveç korsisë së biçikletave, që do të jetë vetëm asfalt me pigment të kuq, pasi gurët mund të jenë të rrëshqitshëm për biçikletat.
Në kuadër të projektit “Tirana Walk 21” përparësi do të kenë këmbësorët dhe çiklistët. Konkretisht në rrugës “Ismail Qemali” do të ketë vetëm një rresht nga dy aktualisht për parkimin e automjeteve. Kjo do të çojë në zgjerimin e trotuarit për kalimin e këmbësorëve dhe krijimin e një piste për biçikletat.”
Trotuaret zgjerohen vetëm nga 20 cm në çdo anë për të lejuar rritjen e rrenjëve të pemëve ekzistuese, të cilat aktualisht janë direkt ngjitur me bordurat e betonit. Ndërkohë që rrugët “Pjetër Bogdani”, Vaso Pasha dhe Brigata VIII do t’i nënshtrohen zgjerimit në të dy anët duke krijuar më shumë hapësira në trotuare për këmbësorët.
Aksi rrugor propozohet me gjerësi 3.25 m. Në njërën anë të rrugës propozohen disa xhepa për parkim të përkohshëm. Ndërsa, në anën tjetër, parkimi eliminohet dhe lejohet zgjerimi i trotuareve në të dyja anët.
Projekti për rikualifikimin e rrugëve të Bllokut synon të arrijë po këto cilësi të lartpërmendura, të cilat do të shërbejnë për qytetarët e Tiranës duke ndryshuar në mënyrë efektive hierarkinë tradicionale të përparësisë së automjeteve, duke i dhënë përparësi këmbësorëve.
