Të mërkurën hyjnë në fuqi tarifat e reja të Trump, 11-50% më të larta

Doganat e Shteteve të Bashkuara kanë nisur mbledhjen e tarifës 10% të vendosur nga presidenti Donald Trump, ndaj të gjitha importeve të shumë shteteve, përfshirë Kosovën e Shqipërinë.

Ndërkaq, tarifat më të larta për mallrat nga 57 partnerët më të mëdhenj tregtarë të SHBA-së do të nisin që të zbatohen javën e ardhshme. Vendimi për tarifën fillestare bazë prej 10 për qind nisi së zbatuari në portet detare, aeroportet dhe magazinat doganore të SHBA-së në orën 12:01 të mëngjesit.

Të mërkurën do të hyjnë në fuqi tarifat më të larta reciproke të Trumpit që variojnë nga 11-50%. Importet nga Bashkimi Evropian do të goditen me një tarifë prej 20%, ndërkaq mallrat kineze me një tarifë prej 34%, duke e çuar në total në 54% tarifën e re për Kinën.

Kanadaja dhe Meksika janë përjashtuar nga tarifat më të fundit të Trumpit, pasi ato janë ende subjekt i një tarife prej 25%, që u vendos lidhur me krizën e fentanilit në SHBA. Trump ka përjashtuar nga tarifat e reja, mallrat që janë subjekt i tarifave të veçanta prej 25% për arsye të sigurisë kombëtare. Këtu hyjnë çeliku dhe alumini, makinat, kamionët dhe pjesët për automjete.

Administrata amerikane publikoi gjithashtu një listë me mbi 1.000 kategori produktesh që janë përjashtuar nga tarifat e reja. Këtu përfshihen nafta e papërpunuar, produktet e naftës dhe importe të tjera të energjisë, barnat farmaceutike, uraniumi, titani, lëndë drusore etj.