Ekonomia rritet me 3.9%, por bujqësia dhe industria marrin tatëpjetën

Ekonomia shqiptare shënoi një rritje prej 3.96% në tremujorin e fundit të vitit 2024, duke qenë pak a shumë në të njëjtin nivel me rritjen e shënuar në të njëjtën periudhë të një viti më parë prej 3.94%. Të dhënat e detajuara të Institutit të Statistikave tregojnë se rritja ekonomike në këtë periudhë është ndikuar nga sektori i ndërtimit; pasuar nga tregtia dhe akomodimi, degë të lidhura me turizmin; si dhe administrata publike, e nxitur nga rritja e pagave.

Ndërkohë që dy sektorët e rëndësishëm të ekonomisë, për ndikimin që kanë në punësim, por edhe vlerën e shtuar që lënë, si bujqësia dhe industria kanë shënuar rënie.

Sipas INSTAT, sektori i bujqësisë u tkurr me 1.15%, duke shënuar të katërtin vit me rënie. Ndërsa industria shënoi një rënie të konsiderueshme prej 6.78%. Kjo është edhe rënia më e fortë e këtij sektori që nga periudha e pandemisë së Covid 19.

Degët kryesore të ekonomisë, për tremujorin e katërt të vitit 2024, krahasuar me tremujorin e katërt të vitit 2023, paraqiten si më poshtë:
Grupi “Administratra Publike, Arsimi dhe Shëndetësisia” shënoi rritje prej 11,35 %, i pasuar nga aktiviteti i “Pasuri të Paluajtshme” me një rritje prej 10,76 %. Grupi i aktiviteteve “Arte, argëtim dhe çlodhje dhe aktivitete të tjera shërbimi” shënoi rritje prej 9,57 %, grupi i “Tregti, Transport, Akomodim dhe Shërbim ushqimor” shënoi një rritje prej 4,33 %. Grupi “Aktivitete Financiare dhe të Sigurimit” shënoi një rritje prej 2,10 %, aktiviteti i “Ndërtimit” rritje prej 1,57 %, dhe grupi “Informacioni dhe Komunikacioni” shënoi rritje prej 0,06 %.
Aktivetet e “Industrisë, Energjisë dhe Ujit” shënuan rënie prej 7,73 %, aktiviteti i “Bujqësisë, Pyjeve dhe Peshkimit” u ul me 2,70 %, dhe “Aktivitete profesionale dhe Shërbime administrative” shënoi rënie prej 0,05 %.

Taksat Neto mbi produktet u rritën me 14,04 %. Me vlerësimin e tremujorit të katërt, INSTAT paraqet dhe vlerësimin paraprak të PBB-së për vitin 2024,
i cili mbështetur në vlerësimet tremujore, shënoi një rritje prej 3,96 %, krahasuar me vitin 2023.

Treguesi i Produktit të Brendshëm Bruto i përshtatur sezonalisht, në tremujorin e katërt 2024, krahasuar me tremujorin paraardhës, vlerësohet me rritje prej 0,72 %.
Me rritje pozitive u vlerësuan: Grupi “Aktiviteti i Pasurive të Paluajtshme” me 7,80 %, “Aktiviteti i Ndërtimit” me 6,95 %, “Informacioni dhe Komunikacioni” me 6,33 %, “Aktiviteti i Administratës Publike, Arsimit dhe Shëndetësisë” me 4,33 %, “Arte, argëtim dhe çlodhje, aktivitete të tjera shërbimi” me 1.83 %, “Aktiviteti i Industrisë, Energjisë dhe Ujit” me 0,02 %.

Ndërsa, me rënie u vlerësuan: grupi i “Aktivitetit Financiar dhe i Sigurimit” me 9,46 %, grupi “Aktivitete profesionale dhe Shërbime administrative” me 4,64 %, grupi “Bujqësi, Pyjeve dhe Peshkim” me 0,50 % dhe aktiviteti “Tregti, Transport, Akomodim dhe Shërbim ushqimor” me 0,06 %, “Taksat Neto” mbi produktet patën një rënie me 1,03 %.

Produkti i Brendshëm Bruto sipas metodës së Shpenzimeve
Komponentët kryesorë të PBB–së me metodën e shpenzimeve, për tremujorin e katërt të vitit 2024, krahasuar me tremujorin e katërt të vitit 2023, paraqiten si më poshtë:

• Konsumi final i popullatës, i cili përbën peshën kryesore të shpenzimeve në ekonomi u rrit, në terma real, me
  3,26 %;
• Konsumi final i qeverisë u rrit me 0,56 %;
• Komponenti i Formimit bruto të kapitalit fiks u rrit me 2,01 %;
• Eksportet e mallrave dhe shërbimeve u ulën me 1,73 % dhe Importet e mallrave dhe shërbimeve u rritën me 3,12 %.