LIGJET E BIZNESIT
Nis sot shpërndarja e bonusit për pensionistët. Janë në total 730430 pensionistë, brenda dhe jashtë vendit që mund të tërheqin bonusin në çdo sporteli të Postës Shqiptare ose në bankat tregtare, të nivelit të dytë.
Bonusi i pranverës është i dyti pas atij të fundviti. Pensionistët që kanë një pension deri në 20 000 lekë do të marrin 10 mijë lekë bonus dhe 5.000 lekë bonus për fitojnë ata pensionistë, të cilët kanë pensione më të larta se 20.000 lekë.
Ndërkohë, nga totali pensionistëve të cilët përfitojnë nga ky bonus, janë 520 443 pensionistë të cilët marrin një pension mujor më pak se 20.000 lekë në muaj dhe do të jenë përfitues 10.000 lekë, dhe për bonusin prej 5.000 lekësh do të përfitojnë 209987 pensionistë që përfitojnë një pension pleqërie më të lartë se 20.000 lekë në muaj. Efektet financiare që rrjedhin nga zbatimi i këtij vendimi llogariten afërsisht 6,3 miliardë lekë.
Kryeministri Edi Rama ka deklaruar më herët se bonusi i pranverës do të jetë i përhershëm për të gjithë përfituesit, njësoj siç përfitojnë bonus për çdo fundvit. Por, ky bonus do të jetë i lidhur me zhvillimin ekonomik të vendit.
Çdo rritje shtesë e të ardhurave që do të gjenerohen përtej parashikimeve, do të kalojnë në një llogari bankare të posatshme. Ndërsa në Bankën e Shqipërisë është hapur një llogari, që do të funksionojë vetëm për bonuset e pranverës. Ndërkohë, në bonusin e fundvitit, përfituan 724.933 pensionistë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
