Si duhet strukturuar shoqëria civile në integrimin në BE? – Ibrahimaj: Qëllimi ynë, të krijojmë një Këshill Ekonomik në Shqipëri

Dialogu Europian, shoqëria civile dhe integrimi europian, ishin temat të cilat u diskutuan në takimin që organizoi Ambasada Francezë dhe Instituti për Bashkëpunim dhe Zhvillim.

Në këtë takim, mori pjesë dhe Presidenti i Këshillit Ekonomik, Social dhe Mjedisor Thierry Beaudet, i cili prezantoi rekomandimet kryesore të raportit, të përgatitura nga Këshilli Ekonomik, Social dhe Mjedisor në konsultim të ngushtë me aktorët shqiptarë mbi skenarët e mundshëm për strukturimin e dialogut trepalësh midis qeverisë dhe aktorëve socialë.

Raporti propozon krijimin e një institucioni të vetëm për të rritur efektivitetin e konsultimeve dhe për të kontribuar në mënyrë të prekshme në reformat në vazhdim.

“Shoqëria civile e organizuar luan një rol thelbësor në forcimin e demokracisë, shtetit të së drejtës dhe besimit midis autoriteteve publike dhe qytetarëve. Raporti që i dorëzova Kryeministrit paraqet propozime për strukturimin e këtij dialogu, duke e zhvilluar atë në bashkëpunim midis organizatave të shoqërisë civile dhe autoriteteve publike.”

Ndërkohë, sipas ministres Ibrahimaj, krijimi i një Këshilli Ekonomik, Social dhe Mjedisor në vendin tonë, do të përmirësojë klimën mes institucioneve, sektorit privat dhe shoqërisë civile.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

“Qëllimi ynë është krijimi i një Këshilli Ekonomik, Social dhe Mjedisor në Shqipëri, një strukturë e cila do të garantojë një dialog të rregullt dhe të qëndrueshëm midis institucioneve shtetërore, sektorit privat dhe shoqërisë civile. Modeli i suksesit të KESM-së në Francë na shërben si një shembull i rëndësishëm mbi mënyrën se si mund të institucionalizojmë këtë dialog dhe ta kthejmë atë në një forcë që ndikon drejtpërdrejt në hartimin dhe zbatimin e politikave.”

Ndërkohë përfaqësues nga sektori privat, shoqëria civile dhe vendet anëtare të Bashkimit Europian, theksuan se duhet një angazhim i fortë për të thelluar përfshirjen qytetare dhe për të forcuar dialogun institucional, duke hapur rrugën për një proces anëtarësimi më gjithëpërfshirës dhe efektiv në BE.