Dalin shifrat/ Ja sa është tkurrur fuqia punëtore në dy dekada në Shqipëri

Nga Aurora Sulce, Producente Ekzekutive për Biznesin në A2 CNN

Emigrimi i vazhdueshëm po shkakton probleme serioze në tregun e punës. Një raport i qendrës studimore Altax evidenton se forcat e punës në vend janë tkurrur ndjeshëm në 2 dekadat e fundit, duke shkaktuar deformime në strukturën e ekonomisë dhe në demografinë e vendit.

Sipas të dhënave, në vitin 2001, forcat e punës në vend llogariteshin në mbi 1.9 milionë persona, ndërsa kanë rënë në vitin 2023 në 1.4 milionë. Tkurrja në dy dekada vlerësohet në mbi 454 mijë persona ose 24%.

Por cilat janë arsyet e kësaj situate? Pse një pjesë e shqiptarëve refuzojnë të integrohen në tregun e punës?

Arsyeja kryesore është dekurajimi i punëtorëve nga niveli i pagave dhe kushtet e punës, shtysë kjo që një pjesë edhe të emigrojnë. Faktorë të tjerë janë plakja e popullsisë dhe ndryshimi i strukturës së ekonomisë.

Shpërblimi i konsideruar jo i mjaftueshëm për punën e bërë krijon hendekun kryesor mes kërkesës dhe ofertës në tregun e punës. Të dhënat tregojnë se shumica e atyre që punojnë sot janë me paga të ulëta.

Më konkretisht, rreth 32 % janë me paga deri në 50 mijë lekë; dhe 24.6% me paga deri në 60 mijë. Pra, më shumë se gjysma e atyre që sot janë të angazhuar në tregun e punës janë me paga të ulëta në këto fasha. Ndërkohë që vetëm 6.6% janë me paga të larta mbi 150 mijë lekë.

Zyrtarisht sot janë shpallur të lira rreth 5500 vende pune, për të cilat nuk ka kërkesë. E kjo ndodh në një kohë kur Shqipëria vuan nga niveli i lartë i varfërisë.