Dyfishohen aksidentet rrugore në gusht, ndikuan turistët e huaj

Gushti është shoqëruar me rritje të ndjeshme të numrit të aksidenteve rrugorë. Të dhënat e fundit të Institutit të Statistikave tregojnë se në këtë periudhë kanë ndodhur 173 aksidente nga 117 aksidente që u shënuan në gushtin e vitit të kaluar, me rritje vjetore 48%.

“Aksidentet rrugore në 91.9 % të rasteve, kanë ndodhur si pasojë e sjelljes së drejtuesit të mjetit. Numri më i lartë i aksidenteve, në këtë periudhë, është kryer nga grup-mosha 25-34 vjeç, duke zënë 25.4 % të numrit të aksidenteve gjithsej. Në muajin gusht 2024, numri më i lartë i aksidenteve rrugore ka ndodhur përgjatë ditës së premte me 22,5 %, ndërsa numri më i ulët i aksidenteve ka ndodhur përgjatë ditës së martë, me 8.1 %”, thekson INSTAT.

Numri më i lartë i aksidenteve rrugore ka ndodhur përgjatë harkut kohor 19:00-24:00, duke zënë 22,5 % të numrit të aksidenteve rrugore gjithsej.

Në rritjen e numrit të aksidenteve gjatë muajit gusht kanë ndikuar rritja e numrit të turistëve të huaj, por edhe temperaturat e larta.