SPAK kërkon më shumë lekë, duhen mbi 761 mln lekë për zyrat, panelet diellore dhe BKH

Për mobilimin e zyrave të godinës së re, blerjen e pajisjeve elektronike dhe vendosjen e paneleve diellore në tarracën e ndërtesës, Prokuroria e Posaçme Antikorrupsion kërkon më shumë se 761 milionë lekë shesë nga arka e shtetit.

Në shkresën drejtuar Ministrisë së financave, SPAK argumenton se një pjesë e parave nevojiten për vënien në funksion të plotë të Byrosë Kombëtare të Hetimit.

“Kërkesa për fonde shtese në zërin e shpenzimeve të personelit lidhet me nevojën për 40 punonjës shtesë për BKH në pozicionin hetues me kosto 273.3 milionë lekë si dhe 205.6 milionë lekë janë përllogaritur nga institucioni si diference me tavanet buxhetore referuar strukturës së plotë të pagave.”

Janë më shumë se 250 milionë lekë që sipas vlerësimeve të SPAK duhen kryesisht për infrastrukturën digjitale dhe fizike të Prokurorisë së Posaçme.

“Kërkesa për fonde shtesë në zërin e shpenzimeve operative lidhet me shërbime mirëmbajtje të sistemeve elektronike, për mallra e shërbime, shpenzime mirëmbajtje godine, shpenzimet e shtuara utilitete. Kërkesa për fonde shtese në zërin e shpenzimeve kapitale nevojiten për blerje skanera dhe ura për kontrollin e objekteve dhe automjeteve”.

Një zë i konsiderueshëm në kërkesën për fonde shtesë vjen për garantimin e sigurisë kibernetike.

“Ne zbatim te ligjit “Për sigurinë kibernetike”, AKCESK ka kërkuar parashikimin për shpenzime financiare për kostot për infrastrukturën e sigurisë kibernetike, kosto për implementimin e standardeve, si dhe kosto për rritjen e kapaciteteve.”

Këtë vit, Prokuroria e Posaçme Antikorrupsion pati në dispozicion mbi 1.8 miliardë lekë nga buxheti i shtetit nga rreth 1.2 miliardë vitin e shkuar,/A2