Gjykata Kushtetuese ka shyqrtuar kërkesë-padinë për shfuqizimin e pjesshëm të vendimit që rriti çmimet e referencës së apartamenteve në Tiranë.
Në seancën e parë të zhvilluar ndërtuesit argumentuan se vendimi ka efekt prapaveprues, cenon fitimet, por dhe ka shtuar kostot në ndërtim.
“VKM aplikoi në mënyrë të menjëhershme një rritje drastike të rritjes së taksave bazuar në sondazhe ku thuhej se ka rritje të çmimeve në treg. Ky nuk është argument . Janë rritur çmimet referuese nga 30%-60%. Dhe thuhet se do luftohet informaliteti me rritjen e taksave. Po kur ulen çmimet a duhet të ulë qeveria taksat? Mund të ketë një mbiofertë në treg po me ndërtimet pse po veprohet kështu”, u shpreh avokati i ndërtuesve.
“Efekti i ligjit prek çdo person që ka një apartament në Tiranë. Çmimi i një apartamenti me këtë ligj do jetë në çmimet e reja të diktuara, dhe një pallat i amortizuar, ky ligj nuk merr parasysh vjetërsinë. Ti shite sa të duash por do taksohesh njëlloj. Çmimi i referencës në vetvete s’ka në objekt taksimin por formalizimin”.
Përfaqësues të qeverisë i hodhën poshtë këto argumente pasi sipas tyre ligji nuk ka efekt prapaveprues.
“Nuk ka fuqi prapavepruese, por me ndryshimin e çmimit mesatar të referencës së banesave i sjell efektet për të ardhmen. S’ka të bëjë me mënyrën e shtrirjes së efekteve në kohë”, u shpreh avokatja e qeverisë.
Pas dëgjimit të palëve kryetarja e Gjykatës Kushtetuese lajmëroi shtyrjen e seancës me qëllim sjelljen e të dhënave dhe provave të reja. Ndryshimet në vendim që sollën rritjen e çmimeve të referencës për 32 zona kadastrale hyri në fuqi në maj të 2023.
