Vendi ku të huajt janë të kënaqur me karrierën e tyre

Të huajt që emigrojnë në Danimarkë janë ndër më të lumturit me jetën e tyre të punës, sipas sondazhit të fundit të Expat Insider nga InterNations, komuniteti global online për njerëzit, që janë shpërngulur jashtë vendit.

Vendi nordik renditet i pari nga vendet ku njerëzit janë më të kënaqur me punën e tyre, mundësitë e karrierës dhe ekuilibrin punë-jetë, ndër aspekte të tjera.

Kjo bazohet në përgjigjet e anketës me më shumë se 12,500 njerëz, që jetojnë në vende të huaja dhe reflekton ndjenjat e tyre në katër kategori të gjera, që mbulojnë tema të punës, duke përfshirë perspektivat e tyre të karrierës, pagat dhe sigurinë e punës, kulturën dhe kënaqësinë e punës, si dhe punën dhe kohën e lirë.

Danimarka ka pikët më të larta për dy grupime: kulturën e punës dhe kënaqësinë, si dhe punën dhe kohën e lirë.

Rreth 84% e të huajve në Danimarkë janë të kënaqur me ekuilibrin punë-jetë, krahasuar me një mesatare globale prej 60%; një pjesë e ngjashme janë të kënaqur me orët punës dhe, mesatarisht, punojnë 39.2 orë në javë, krahasuar me mesataren botërore 42.5 orë.

Dhjetë vendet kryesore ku emigrantët janë më të lumtur me punën:

1. Danimarka
2. Arabia Saudite
3. Belgjika
4. Holanda
5. Luksemburgu
6. Emiratet e Bashkuara Arabe
7. Australia
8. Meksika
9. Indonezia
10. Austria

Në vendin e dytë është Arabia Saudite, ku shumica, 75%, thonë se lëvizja atje ka përmirësuar perspektivat e tyre për karrierë, kundrejt 56% në nivel global. 63% e të huajve zhvendosen në Arabinë Saudite për punë, ku thonë se janë të kënaqur me gjendjen e ekonomisë lokale.

Ndërkohë, vetëm 35% e emigrantëve në mbarë botën, thonë se janë shpërngulur në një vend të huaj për arsye të lidhura me punën.

Dobësitë më të mëdha të punës në Arabinë Saudite mund të jenë orët e gjata – emigrantët që punojnë atje raportojnë se punojnë 47.8 orë në javë.

Në tre vendet e para renditet Belgjika, ku emigrantët janë shumë të kënaqur me sigurinë e punës, tregun lokal të punës dhe mundësitë për karrierë.

Të huajt në Belgjikë thonë se gëzojnë fleksibilitet në vendin e punës, veçanërisht në mesin e 68%, që thonë se mund të punojnë në distancë, dhe javën e punës me kohë të plotë më të shkurtër se mesatarja prej 40.8 orësh.

Panamaja u njoh si vendi më i mirë për emigrantët në përgjithësi, sipas sondazhit të InterNations.

Renditja e përgjithshme llogarit jetën dhe faktorët financiarë, ku të huajt thonë se janë të kënaqur me cilësinë e jetës, lehtësinë e shpërnguljes atje, financat personale dhe një indeks thelbësor për emigrantët, i cili mbulon strehimin, administratën, gjuhën dhe jetën digjitale.