KESH nis importin e energjisë, 2.7 milionë euro në një javë

Gati 2.7 milionë euro në vetëm një javë. Kaq para ka shpenzuar Korporata Elektroenergjetike Shqiptare në vetëm një javë për të blerë energji. Me çmim mesatar 106 euro janë blerë mbi 25 mijë megavatorë energji.

Në linjë me temperaturat e larta po shtohen edhe importet e energjisë elektrike nga jashtë. Për të garantuar furnizimin vetëm për javën e parë të korrikut, Korporata Elektroenergjetike Shqiptare ka blerë mbi 25 mijë mehavatorë energji elektrike. Me çmim mesatar 106 euro për megatvat/orë, në total janë shpenzuar gati 2.7 milionë euro.

Kjo për shkak të mungesës së reshjeve dhe parashikimeve për vijim të thatësisë e cila pritet të bëhet edhe më e ashpër në dy muajt në vijim, kombinuar me nevojën e shtuar nga turizmi. Rrezet e forta të diellit kanë ulur në 1 mijë e 272 metër kub për sekondë rezervën hidrike në Kaskadën e Drinit.

Në raport me korrikun e një viti më parë, rezerva hidrike është tkurrur me 10 për qind, por duke mbetur gjithsesi mbi mesataret shumëvjeçare.

Për shkak të kërkesës së lartë që shumë vende europiane po kanë, të dhënat nga bursa hungareze HUPX tregojnë se ndonëse me luhatje çmimi i energjisë elektrike po rritet. Nga më pak se 100 euro në fund të muajit të shkuar, në 1 korrik një megavat energji kushtoi mesatarisht 145 euro.

Dalja në importe e KESH vjen pas shumë muajsh shitje të energjisë si pasojë e mbiprodhimit. Kryesisht në prill e maj, Korporata Elektroenergjetike Shqiptare kishte provuar të menaxhonte rezervën hidrike me anë hidrike me anë të procedurës së optimizimit. Pra KESH shiste energji në periudhë piku dhe blinte në kohën kur energjia ishte më e lirë.