LIGJET E BIZNESIT
Flota shqiptare e anijeve ka dalë nga Lista e Zezë e Organizatës së Memorandumit të Mirëkuptimit të Parisit. Renditja e Shqipërisë tashmë në Listën Gri, është dëshmi se anijet tona përmbushin standardet ndërkombëtare të sigurisë dhe mjedisit, si dhe kushte mesatare të përshtatshme pune për anëtarët e ekuipazhit.
Në një postim në rrjetet sociale, Komuniteti Ndërkombëtar i Transportit ka përgëzuar Shqipërinë lidhur me angazhimin dhe masat efektive të marra për arritjen e këtij rezultati.
Në korrik 2021, ky Komunitet në bashkëpunim me Autoritetin Portual të Durrësit dhe Drejtorinë e Përgjithshme Detare të Shqipërisë, hartuan një udhërrëfyes gjithëpërfshirës që përmbante 34 masa të forta për përmirësimin e performancës së flotës shqiptare. Pas tre vitesh përpjekje, në listën e publikuar së fundmi nga Komiteti i Memorandumit të Mirëkuptimit të Parisit, flota shqiptare vlerësohet me një performancë mesatare.
Dalja e Shqipërisë nga Lista e Zezë nënkupton se autoritetet portuale nuk do të ushtrojnë më kontrolle të rrepta ndaj anijeve. Mjetet lundruese nën flamurin “Gri” do të jenë objekt i kontrolleve më të pakta nga autoritetet portuale, pasi konstatohen me një nivel më të lartë sigurie se më parë.
Nëpërmjet një sistemi të harmonizuar të kontrollit shtetëror portual, Organizata e Memorandumit të Mirëkuptimit të Parisit kryen çdo vit më shumë se 17.000 inspektime në bordet e anijeve të huaja nëpër porte. Me përmirësimin e performancës së saj, pritet që Shqipëria të aplikojë së shpejti për anëtarësim të plotë në këtë organizatë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
