Anglia bën ndryshime në ligj për “Restorantet dhe Zyrat”

Baret, restorantet dhe zyrat në Mbretërinë e Bashkuar, pra ndërtesat e reja publike dhe të biznesit do të duhet të kenë tualete të veçanta për burra dhe gra, raporton Times.

Ministrat britanikë thanë se ndryshimet në ligj do të rrisin “sigurinë, privatësinë dhe dinjitetin” e grave.

Sipas këtyre dispozitave, ata që nuk mund ta ofrojnë këtë do të duhet të kenë një dhomë që përfshin një tualet, lavaman dhe tharëse duarsh pas një dere që mbyllet.

Ministrat thanë se vendimi do t’i jepte fund rritjes së numrit të të ashtuquajturave tualete “neutrale gjinore” që mohonin privatësinë.

Ndryshimet në ligj, megjithatë, u kritikuan nga aktivistët e të drejtave LGBTQ, të cilët paralajmëruan se ai do të margjinalizonte më tej njerëzit transgjinorë.

Qeveria britanike propozoi fillimisht ndryshimet në ligj vitin e kaluar, pavarësisht një fushate të fortë nga kundërshtarët e ndryshimeve të cilët thanë se gratë transgjinore do të rrezikoheshin për sigurinë e tyre duke u detyruar të përdorin tualetet e burrave.

Një sondazh i opinionit publik i kryer nga agjencia YouGov në fillim të vitit tregoi se 48 për qind e njerëzve nuk ndihen komod kur përdorin tualete neutrale gjinore, duke përfshirë 57 për qind të grave.