Pak muaj përpara nisjes së sezonit turistik, qeveria ka paralajmëruar bizneset në zonat bregdetare që të vendosin impiante përpunimi para se të shkarkojnë ujërat e ndotur.
Ultimatumi është dhënë nga zv. kryeministrja Belinda Balluku në drejtim të bashkive dhe operatorëve turistikë. Bashkë me Ballukun ka qenë edhe ministrja e Turizmit dhe Mjedisit, Mirela Kumbaro. “Të gjitha subjektet që preken nga ky akt normativ kanë kohë 90 ditë duke nisur nga sot, për të vendosur impiantet e përpunimit të ujërave të ndotura”, ka thënë Balluku.
Ministrja e Turizmit dhe Mjedisit, Mirela Kumbaro, kërkoi nga bashkitë që të njoftojnë të gjithë operatorët mbi detyrimet e reja, për të pasur në vijim një sezon turistik me ujëra të pastra në brigjet tona.
Detyrimi për instalimin e impianteve të trajtimit dhe largimit të ujërave të ndotur përfshin të gjitha llojet e subjekteve, duke nisur nga strukturat akomoduese, agroturizmat, bujtinat, hotelet, komplekset turistike, baret, restorantet, etj. Për kontrollin e menaxhimit të ujërave të ndotura do të ngrihet një task forcë e dedikuar nën varësinë e Agjencisë Kombëtare të Ujësjellës-Kanalizimeve.
Sipas të dhënave nga Ministria e Infrastrukturës dhe Energjisë, në total pranë atyre që quhen ujëralarës janë 9000 subjekte. Task-Forca e ngritur do të ketë përgjegjësinë edhe të vendosjes së masave administrative, në rast të konstatimit të shkeljeve. Vlera e gjobave do të variojë nga 1,5 milionë lekë, në 2,65 milionë lekë.
