Nis falimenti i kompanive fason, vetëm në Korçë 550 të papunë

Sektori fason ka nisur pushimet masive nga puna dhe shumë fabrika po mbyllen. Shoqata Pro Eksport Albania, që mbron interesat e kësaj industrie njoftoi se janë në Korçë janë shkurtuar 550 vende pune këtë fillim viti dhe disa biznese po shpallin falimentin.

Sipas të dhënave nga kjo shoqatë, kompania “Extrem shpk’ në Korçë, që kishte 170 punëtorë, po mbyllet. “Spanjel shpk” po në Korçë kishte 350 punëtorë dhe aktualisht ka vetëm 130.

Kompania “Damson” po në Korçë kishte 70 punëtorë dhe aktualisht ka vetëm 30. Po në Korçë kompania “Panspi shpk” kishte 160 punëtore dhe sot ka vetëm 70.

Sipërmarrësja Valbona Vangjeli mbylli fabrikën në Korçë, teksa të tjerat kanë ulur fuqinë punëtore dhe kanë probleme me pagesat nga porositësit, njoftoi Shoqata Pro-eksport.

Në Bilisht  “Toni Oil shpk” që në vitin 2023 kishte 140 persona të punësuar, sot ka vetëm 8.

Sakaq në Tiranë “Shirt&Company – Erman Alba” kanë larguar 170 punonjës nga puna.

Shoqata Pro-eksport raportoi se falimentet do të jenë të mëdha këtë muaj. Shumë fabrika kanë mbajtur punonjësit në punë vetëm sa për të mbyllur vitin.

Kjo situatë ishte paralajmëruar nga biznesi fason, për shkak të problemeve të shumta që po haste sektori, ku më kryesori ishte zhvlerësimi i ndjeshëm i euros.