Siguria ekonomike e Shqipërisë mund të cenohet nga shtete të huaja jomiqësore, duke e përdorur këtë të fundit si mjet presioni politik. Është ky një nga shqetësimet e ngritura në Strategjinë e re të Sigurisë Kombëtare 2023-2028, në të cilat tregohen “pikat e dobëta” nga të cilat vendi mund të goditet.
“Krimet në ekonomi gjithashtu mbeten faktor me rrezikshmëri për rritjen e qëndrueshme ekonomike, besueshmërinë dhe stabilitetin e sistemit financiar. Krimet në ekonomi janë sofistikuar nga teknologjitë e reja financiare dhe përbëjnë shqetësim për shkak të ndikimit në ekonomi. Pastrimi i parave dhe i produktit kriminal është problematikë prezente e me tendenca të larta impakti për ekonominë e vendit dhe sundimin e ligjit”, lexohet në draftin e ri.
Rreziqet që i kanosen Shqipërisë në drejtim të ekonomisë, sipas dokumentit paraprak të Sigurisë Kombëtare përfshijnë, janë sa faktorët e jashtëm, aq edhe ata të brendshëm. Plagë të vjetra të trashëguara mund të kthen në sëmundje të pashërueshme për vendin, vlerësojnë institucionet që kanë përgatitur dokumentin: “Korrupsioni dhe perceptimi mbi nivelin e tij minon besimin e publikut tek qeverisja e mirë dhe sundimi i ligjit, cenon zhvillimin e vendit, forcimin e institucioneve, rritjen e qëndrueshme ekonomike, si dhe mbetet faktor që ngadalëson dhe dëmton procesin e reformave si dhe dekurajon investimet e brendshme e të huaja, të nevojshme për të krijuar mundësi punësimi për të gjithë”.
Po aq sa ato të trashëguara, edhe plagët e krijuara rishtas si ajo e shpopullimit shihen si rrezik për paqëndrueshmëri socio-ekonomike të Shqipërisë: “Problemet social-ekonomike mbeten faktori kryesor që nxit emigrimin e parregullt të shtetasve shqiptarë, numri i të cilëve ka njohur rritje. Një problem tjetër është edhe migrimi nga zonat rurale drejt zonave urbane, i cili ul forcën e punës dhe kapacitet prodhuese duke kthyer fermerët nga prodhues në konsumatorë të produkteve agroblegtorale, duke cenuar në këtë mënyrë garantimin e furnizimit me produkte ushqimore të popullatës dhe krijuar një varësi të shtuara nga importet e këtyre produkteve”.
Strategjia e re e Sigurisë Kombëtare pritet të kalojë brenda këtij viti për miratim në Parlament. Brenda gjashtë muajsh nga dhënia e pëlqyeshmërisë edhe të Presidentit, ministritë dhe institucionet e tjera do të duhet të hartojnë strategji sektoriale për zbatimin e saj. Zbatimi i strategjisë do të bëhet nga Këshillimi i Ministrave, ndërsa Kuvendi do të jetë institucioni që do të monitorojë procesin. /A2 CNN
