LIGJET E BIZNESIT
“Turizmi, të vërtetat pas rekordit” u diskutuan në emisionin A2 Business të gazetares Aurora Sulce.
Ekspertët dhe operatorët e tregut analizuan bilancin e sezonit turistik këtë vit, ky mbi 7.2 milionë turistë shkelën në Shqipëri deri në gusht. Por a është ky turizmi që duam? Turizmi masiv që shoqëroi promovimin e Shqipërisë si “Maldivet e Europës”, por me çmime të lira?
Luixhino Isufaj, operator turistik në një lidhje Skype për emisionin ka përkufizuar turizmin në Shqipëri përgjatë këtij sezoni, jo si turizëm elitar, por turizëm mase. Sipas tij, marketingu që i është bërë vendin si “Maldivet e Europës, por më e lirë”, nuk ka qenë një strategji e duhur.
“Më shumë kanë qenë në mase sesa konsumator, duhet të marketojmë jo vetëm të lirë, por edhe luks”, tha Luixhino Isufaj.
Ai u ndal edhe te mungesa e krahut të punës. “I kemi përballuar duke u shtuar oraret punëtorëve dhe duke punuar që të gjithë në maksimum, por është e pa arritshme”, përfundoi Isufaj në “A2 Business”.
Aida Gjecaj, në një lidhje direkte nga Thethi shpjegoi gjatë emisionit se veriu i vendit këtë vit u përball me një fluks të lartë teksa nevoja për struktura akomoduese mbetet urgjente.
Gjecaj shprehet se qeveria duhet të ndërhyjë me leje të posaçme me leje, pasi veriu ka nevojë për bujtina të tjera në mënyrë që vizitorët të mos kthehen mbrapsht.
Megjithatë, vizitorët kanë qenë kryesisht me buxhet të kufizuar.
Në Alpe kemi pasur turistë backpacker ose siç quhen ndryshe me bukë me vete që kërkojnë standardin më të mirë, por me çmime më ulëta.”
Aida Gjecaj shpjegon se në veri të vendit ka pasur rritje të çmimeve deri në 15% dhe kjo për shkak të rrethanave që kanë ndikuar në rritjen e çmimeve në të gjithë vendin. Kjo ka bërë që turistët, sipas saj, të ankohen për çmimet referuar standardit të zonës.
Ndërsa operatori turistik Blerim Norja nga Durrësi vuri në pah se përgjatë sezonit turistik, në qytetin e Durrësit ka pasur një mungesë të theksuar të stafit të kuzhinës dhe sanitare, ndërsa shton se në shërbim nuk ka qenë i njëjti problem.
“Burimet njerëzore kanë qenë një problem, sepse në momentin e sezonit ka pasur mungesa të theksuara, staf kuzhine dhe sanitare, ndërsa për pjesën e shërbimit ka qenë më e lehtë”, tha Norja.
Ai ka sqaruar dhe se si funksionon rekrutimi i stafit, ku mungojnë profesionistët. Në këto kushte, vetë biznesi e nis këtë proces në fillimin e vitit me trajnimin e personelit në mënyrë që të jenë gati për sezonin turistik.
“Ne fillojmë rekrutimin e në fillim të vitit, që piketojmë të rinj që duan të punojmë dhe i trajnojmë dhe bëjnë praktikë në fundjava, dhe kur fillon sezoni jemi të kompletuar”, përfundoi Blerim Norja.
Të dhënat tregojnë se në turizëm mungojnë punonjës në të gjitha nivelet: Profili i ulët, si kamarier, banakier, ndihmës kuzhinier dhe stafi i mirëmbajtjes. Profil i mesëm, ku përfshihen guidat turistike, shoferë për qëllime turistike, ciceronët e siteve turistike dhe organizatorët e aktiviteteve rekreative. Dhe profili i lartë, ku përfshihen drejtues operacionesh turistike, menaxher hoteli, menaxher destinacioni dhe drejtues të agjencive turistike.
