Thirrjet për ulje çmimesh, prodhuesit e miellit: Kostot akoma të larta, do të presim

“Tregtarë, po ju pse nuk i ulni çmimet e produkteve të fabrikuara? Pseeeee? Po ju tregtarët e miellit e pastaj të bukës çfarë po bëni? Çmimi i grurit ka rënë, çmimi i misrit ka rënë, çmimi i thekrës ka rënë; po çmimi i bukës pse rri ai që ishte kur ju e ngritët? Kulmi”, ishte thirrja e Erion Braçes.

Drithërat, vajrat, bulmeti dhe mishi janë ndër ato produkte ushqimore që sipas indeksit të FAO-s kanë pësuar rënie në bursat botërore. Mirëpo, në Shqipëri, ashtu si në shumë vende të tjera europiane, po kërkohet vazhdimisht edhe ulja e çmimeve në raftet e marketeve.

Sipas tregtarëve, kjo gjë nuk po ndodh, për shkak se kriza është zhvendosur nga çmimet e lëndëve të para, karburantit dhe energjisë, tek presioni për rritje pagash, materialesh të tjera, e deri tek kostot e ambalazhit.

“Nuk është e thjeshtë që ndodhi një rënie dhe ajo të reflektohet. Ndërkohë që ndodhë një rënie te një sektor,  tek  lënda e parë në përbërësit e tjerë që marrin pjesë në realizimin e produktin final, mund të jenë në rritje. Kemi ambalazhin s’ka ndryshuar fare, pagat e punëtorëve, materialet ndihmëse s’kanë pasur ndonjë rënie”, tha Adi Haxhiymeri, prodhues.

Edhe pse importuesit po përfitojnë nga luhatja e euros, sipas Haxhiymerit, këto biznese po hasin sërish kosto të larta deri në paraqitjen e produktit final tek konsumatori. Nëse do të ketë një rënie të çmimeve për produktet e importuara apo do të ketë qëndrueshmëri, ai thotë se kjo varet nga situata klimaterike e vendeve të tjera.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

“Do shohim si do ndodhi situata në botë mund të jetë favorizuese ose jo. Momentalisht bota po kalon thatësira shumë të larta dhe zona të tjera kalojnë në përmbytje. Kemi një amplitudë shumë të fortë ndërmjet klimave”, shtoi ai.

Ndërkohë, prodhuesit e miellit deklarojnë se ky është momenti që krahas çmimeve të diskutohet edhe për cilësinë e tij. Sipas Haxhiymerit, vendi ynë ende nuk i ka të gjithë laboratorët e nevojshëm për kontrollin e cilësisë dhe prodhuesit i kanë kërkuar qeverisë të investojë në këtë drejtim./A2 CNN