Ujësjellësat kanë krijuar sërish borxhe, duke rënduar situatën e institucioneve publike me detyrimet e prapambetura. Borxhet e shoqërive të ujësjellës-kanalizimeve ndaj Operatorit të Shpërndarjes së Energjisë Elektrike për energjinë e papaguar arritën në vitin 2022 në rreth 18.18 miliardë lekë, nga 15.72 miliardë lekë që kjo vlerë ishte në fund të vitit 2021.
Kjo është shifra më e lartë e akumuluar ndonjëherë nga institucionet jobuxhetore, të paktën që nga vitin 2010.
Nisur nga akumulimi i detyrimeve të prapambetura, në dhjetor të vitit 2020 Ministria e Infrastrukturës dhe Energjisë dhe ajo e Financave dhe Ekonomisë miratuan një plan veprimi që ndër të tjera synonte reduktimin e qëndrueshëm të stokut të detyrimeve të prapambetura të akumuluara ndërmjet kompanive, pjesë e të cilit ishin edhe borxhet e ujësjellësve.
Gjithsesi, të dhënat zyrtare tregojnë se edhe pas miratimit të këtij plani, borxhet nuk janë shlyer, përkundrazi. Të dhënat tregojnë se pas korrikut të vitit 2015, tendenca për të mos paguar energjinë e konsumuar ka qenë vetëm në rritje, duke shënuar rekordin në dhjetor të vitit 2022.
