Banka Botërore konstaton se pas pandemisë, pabarazia është thelluar. E thënë ndryshe, të pasurit janë bërë më të pasur dhe të varfërit, më të varfër. Madje, Shqipëria dhe Mali i Zi janë vendet me nivelin më të lartë të pabarazisë në rajon. Producentja Ekzekutive për Biznesin në A2 CNN, Aurora Sulce ka përkthyer pabarazinë me të ardhura, duke e shpjeguar me grafikë që të jetë e kuptueshme për të gjithë.
Me sa të ardhura jetojnë sot shqiptarët?
E dhëna e fundit zyrtare është ajo e vitit 2020, që përkon me nisjen e pandemisë. Të ardhurat për frymë kanë zbritur në 579 mijë lekë në vit, ose 48.2 mijë lekë në muaj për individ.
Në Shqipëri, pjesa dërrmuese e shqiptarëve i sigurojnë të ardhurat e tyre nga pagat dhe pabarazia e fortë nis që këtu.
48.9% e totalit të të punësuarve janë me pagë deri në 40 mijë lekë që është edhe paga minimale. Ndërkohë që vetëm 5.4% janë të punësuarit me pagë të lartë, mbi 120 mijë lekë.
Por cilat janë qarqet me nivelin më të lartë të të ardhurave për frymë, ku janë të përqëndruar edhe pjesa më e madhe e të punësuarve sipas pagave? Të dhënat e INSTAT tregojnë se Tirana, Fieri, Gjirokastra dhe Durrësit kanë nivelin më të lartë të të ardhurave për frymë nga 563 mijë lekë në Durrës deri në 777 mijë lekë në Tiranë.
Tirana, Durrësi dhe Fieri kanë edhe përqëndrimin më të madh të popullsisë, në bazë të lëvizjeve migratore, ndërsa niveli i lartë i të ardhurave për frymë në Gjirokastër shpjegohet me remitancat nga emigrantët dhe jo me zhvillimin ekonomik.
Por cilët janë qarqet me nivelin më të ulët të ardhurave për frymë? Sipas INSTAT, rezultojnë Kukësi, lezha, Shkodra, Elbasani, Dibra dhe Korca. Të ardhurat për frymë variojnë nga 364 mijë lekë në vit në Kukës, që është edhe qarku më I varfër I vendit në 434 mijë lekë në Korcë.
Niveli i të ardhurave është i lidhur me aktivitetin ekonomik. Ajo që të dhënat tregojnë qartë është zhvillimi ekonomik i vendit është përqëndruar në trekëndëshin Tiranë-Durrës-Fier.
Është ky trekëndësh që kontribuon më shumë në rritjen ekonomike të vendit dhe rrjehdimisht, përfiton më shumë prej saj. Për pjesën tjetër të qarqeve mundësitë për të rritur të ardhurat janë minimale ose thuajse zero, cka bën që këto zona të kenë edhe nivelin më të lartë të emigrimit.
