Pas bonove të thesarit, edhe interesat e obligacioneve 10-vjecare kanë pësuar rënie. Një trend që nuk po ndikohet nga rritja e normës bazë të interesit për lekun, që teorikisht duhet të shkaktonte në rritje të yield-it. Por kërkesa e lartë e qytetarëve për të investuar në këto letra të qeverisë me afat të gjatë kanë ndikuar në uljen e interesave.
Kjo rezultoi nga rihapja e ankandit të obligacioneve 10-vjeçare të emetuara në muajin janar të këtij viti. Sipas të dhënave nga Ministria e Financave dhe Ekonomisë (MFE), yield-i uniform i pranuar i këtyre instrumenteve zbriti në 6.6%, nga 7.6% që kishte qenë në ankandin e muajit janar.
Interesi i investitorëve ishte përsëri i lartë dhe shuma e kërkesave në ankand arriti në 7.1 miliardë lekë, nga 3 miliardë lekë që ishte shuma e shpallur për financim nga Ministria e Financave. Edhe në këtë rast, ky dikaster vendosi ta rrisë shumën e pranuar me maksimumin e lejuar prej 15%, duke e çuar atë në 3.45 miliardë lekë.
Likuiditeti i lartë në sektorin financiar po luan gjithashtu një rol të rëndësishëm në uljen e yield-eve, duke rritur konkurrencën mes investitorëve për bonot dhe obligacionet qeveritare.
