Varfëria tek të rinjtë, Shqipëria renditet vendi i dytë në rajon

Edhe pse konsiderohet si pjesa më vitale e shoqërisë, të rinjtë rezultojnë më të varfërit në Shqipëri. Megjithatë, kjo nuk është një dukuri tipike shqiptare. Edhe në vendet e tjera më të zhvilluara, kjo kategori konsiderohet më e varfra për shkak të vështirësive për t’u futur dhe integruar në tregun e punës.

Të dhënat e Institutit të Statistikave tregojnë se në vitin 2020, risku i të rinjve për të qenë të varfër kryesisht për moshën 15-29 vjeç  ndaj totalit të popullsisë të riskuar për të qenë të varfër kap shifrën 27.2%. Predispozita është me e madhe tek vajzat. 30.1% e vajzave janë prekur nga ky fenomen ndërsa djemtë  26.7%. Krahasuar me një vit këto vlera lehtësisht kanë shënuar një trend rënës. Në 2019-ën,  31.7% e vajzave ishin të riskuara nga varfëria dhe 27.9% e djemve u riskuan.

Në rajon situata paraqitet pak a shumë e njëjtë. Sipas të dhënave të Institutit Europian të Statistikave (Eurostat), ndërsa në Shqipëri 24.4% e të rinjve janë të riskuar për të qenë të varfër. Maqedonia e Veriut regjistron shifrën më të lartë 25.1%, Shqipëria e dyta dhe më pas Serbia.

Nga ana tjetër përsa i përket shkallës së privimit të rëndë material dhe social, Shqipëria zë vendin e parë në Europë, 34% disa herë më e lartë se shkalla në të gjithë Europën, 6.1%.

Në krahasim me rajonin, përqindjen më të ulët të privimit material dhe social e ka Serbia, me 10.4% në 2020-n dhe 11.6% në 2021-n. Për Maqedoninë e Veriut, treguesi është 14.9% (2020) ndërsa rritet në Mal të Zi në 22.3 (2020).