Skema e pensioneve/Ish ministri i Ekonomisë: Duhet shtylla e tretë në sistem, të nxiten pensionet private

Ish ministri i Ekonomisë, Zef Preci argumenton se nevojiten ndërhyrje në skemën e pensioneve, për të krijuar kolonën e tretë të sistemit, atë të bashkëpunimit shtet-privat. Duke shpjeguar ndikimin që rritja e pagës minimale do të ketë tek skema e pensioneve, për shkak të rritjes së nivelit të kontributeve, Preci deklaron se me sistemin aktual, qytetarët nuk kanë interes të paguajnë kontribute, pasi përfitimi kur dalin në pension, është shumë i vogël.

“Ndoshta jemi ndër vendet e rralla që njerëzit që e kanë kaluar moshën e pensionit, vazhdojnë të punojnë dhe ne i detyrojmë të vazhdojnë të paguajnë detyrimet. Pra, ne që këtu rrëzojmë bazën e sistemit, që merr në konsideratë pagesën në vite. Masa e përfitimit pasi ke kontribuar për shumë vite është shumë e vogël lidhur me nivelin e pagës që ka pasur I punësuari ose e punësuara.

Maqedonia ka një sistem shumë të mirë, që qytetari merr përfitim nëpërmjet pensioneve private.  Duhet të ndërtojmë ura ndërmjet kontributeve dhe përfitimeve. Ne duhet të shohim skemat private të pensioneve.  Tu japim mundësi Institutit të Sigurimeve shoqërore dhe skemave paralele që të investojnë atje ku këto para shtohen më shumë dhe më shpejt”, ka deklaruar Preci në emisionin A2 Business të gazetares Aurora Sulce.

Ish ministri i Ekonomisë mbështet krijimin e kolonës së tretë në sistemin e pensioneve, si nxitës për qytetarët që të paguajnë. “Unë jam për një shtyllë të tretë në sistemin e sigurimeve, pasi kjo është mënyra që gjeneron para dhe këto para mund të përdoren në interesin e përfituesve”, shprehet Preci.