Bursa Energjetike Shqiptare do të aktivizohet deri në fund të muajit. Lajmi është bërë I ditur nga ministrja e Energjisë dhe Infrastrukturës, Belinda Balluku në Konferencën për Energjinë.
“E kemi deklaruar disa herë si kohë dorëzimi, por gjithmonë ka pasur problematika pasi ne nuk punojmë vetëm, punojmë me partnerë. Padyshim do të garantojë transparencë, konkurrencë dhe përdorim efikas të kapaciteteve, sidomos sot më shumë se kurrë kur sektori privat po investon fuqishëm në kapacitetet fotovoltaike”.
Sipas Ballukut burimet alternative të energjisë janë mënyra më e mirë për të qenë të përgatitur për çdo krizë tjetër me të cilën mund të përballemi.
“Në Ministrinë e Infrastrukturës dhe të Energjisë kemi aprovuar, kemi dhënë dritën jeshile projekteve të cilat përbëjnë 300 megavat/orë prodhim dhe në ndërkohë janë duke u trajtuar 55 aplikime të tjera që i ekuivalojnë një kapaciteti 1.7 gigavat ose përkthyer në para, në investim, 1.3 miliard euro investime energjetike të sektorit privat në Shqipëri.”
Duke qenë vendi me potencialin më të madh energjetik në rajon, qeveria thotë Balluku po punon për një qëllim.
“Duam të kthejmë Shqipërinë nga një vend importues në një vend eksportues neto dhe kjo do të ndodhë deri në vitin 2029”.
Gjatë vitit 2022 Importi bruto i energjisë elektrike arriti vlerën 3.044 GWh, ndërsa eksporti bruto i energjisë elektrike arriti vlerën 2.123 GWh.
